Tres ta di mas

E buki akí ta trata aseptashon di diferensia ku tin den hende. Den e fase di desaroyo akí ta importante pa mucha rekonosé i aseptá ku tin diferensia den mucha di mes edat. Un konsepto esensial den e buki akí ta: aseptá e diferensia sin pèrdè bo propio identidat.
Laga e muchanan pensa riba similaridat i diferensia ku tin entre mucha di mes edat. Papia tokante esaki i pèrkurá spesialmente pa bisa nan ku e diferensianan ta hasi bida mas riku i ku nan no ta motibu pa no soportá otro.

David Parker

E buki akí ta trata responsabilidat. Komo adulto, nos sa ku nos ta responsabel pa sierto tarea. Mucha chikitu no ta komprondé e konsepto akí asina fásil. Meta di e buki akí ta pa yuda mucha komprondé, ku ora nan tin un tarea di hasi, ta nan responsabilidat – no di otro hende – pa hasié.

Un manera di usa e buki akí ta pa pidi mucha pa menshoná e responsabilidatnan ku nan tin tur dia i diskutí ku nan tokante importansia di hasi e tareanan akí. Puntra nan: ‘Kiko lo por sosodé si bo no hasi bo trabou?’