Mosaiko 5/6

Jan Everaerts

Pako, e makaku baldadi

Pako tabata un makaku kurpa chikí, di mas o ménos un mei meter. Riba un dia mi tabata serka mi wela sintá den adrei patras. Mi wela den su stul di zoya dilanti di e bentana ku ta habri pa kurá, kaminda e tabatin un bon bista riba Pako den su palu, Tan Chita tambe sintá ei ta gosa di su kòp’i kòfi ku su pida suk’i klenku banda di dje.

Den esei mi wela a dal un gritu: ‘Luisita, Pako ta lòs! Mi no ta mir’é mas den e palu, anto Chichi no ta na kas.’ ‘Ban, ban skonde den kamber’, Tan Chita a kontestá anshá.

Shon Kalu, e pushi lèrdu

Shon Kalu a krese bira un pushi mashá grandi, gordo. Su kabes tabata bastante grandi tambe. Henter dia e tabata drumi rèk kurpa den balkon patras ta ronka satisfecho den solo. Mashá floho mes Shon Kalu tabata. Ni pa grasia e no ta muf su kurpa kohe ún raton. I komo Shon Kalu a pasa floho bai, ta lèrdu e ta, pasobra ora un hende òf bestia ta dje floho ei ku e no ke ni muf su kurpa, nan ta yam’é lèrdu.

Carel de Haseth

Carel de Haseth (1950) a publiká algun tomo di poesia manera Bida na koló i Poesia Venená. Pa su novela kòrtiku Katibu di shon el a risibí premio Cola Debrot 1989.

‘Awe tardi fiskal a bolbe interogá mi. Pober hòmber. Promé biaha ku nan a interogá mi, el a kere ku lo mi nenga su akusashonnan. El a kuminsá ku menasá di laga habraká mi si mi nenga di papia. El a bisa mi ku e lo duna òrdu pa laga rèk mi kurpa ku katròl i pone klèm na mi dedenan di man i di pia. M’a hari i m’a splik’é ku e no tin nodi di tuma tantu molèster. Ku mi no tin bèrgwensa di loke m’a hasi i ku si un dia mi bolbe haña chèns, lo mi hasi meskos atrobe.’