Salto Manual pa maestro 8

David Parker

E buki akí ta trata honestidat. Honestidat por ta un konsepto un poko difísil pa mucha yòn komprondé, komo den algun kaso no ta kapas di mira esaki manera un adulto, den e fase di desaroyo ku nan ta.  Ademas, nan ta na un nivel kaminda nan meta ta pa komplasé i pa no pèrdè kariño di e adultonan importante den nan bida. Hopi bes ora nan haña nan konfrontá ku un pregunta ku ta rekerí honestidat, esaki por bira un situashon di konflikto pa nan i nan ke hui for di esei ku un preteksto fantástiko.

Un manera di usa e buki akí ta pa krea situashon ku ta rekerí kontesta honesto i puntra: ‘Kiko abo lo hasi?’ Despues puntra: ‘Dikon bo ta kere esaki ta un bon skohensia?’

E buki akí ta trata aseptashon di diferensia ku tin den hende. Den e fase di desaroyo akí ta importante pa mucha rekonosé i aseptá ku tin diferensia den mucha di mes edat. Un konsepto esensial den e buki akí ta: aseptá e diferensia sin pèrdè bo propio identidat.
Laga e muchanan pensa riba similaridat i diferensia ku tin entre mucha di mes edat. Papia tokante esaki i pèrkurá spesialmente pa bisa nan ku e diferensianan ta hasi bida mas riku i ku nan no ta motibu pa no soportá otro.